Aron masulbad ang kanunay nga pagbaha sa nagkadaiyang mga dapit sa Dakbayan sa Lapu-Lapu, padayon ang pag-ugmad og mga drainage project ni Kongresista Paz Radaza sa lone district sa dakbayan.

Bag-ohay lang, gipangulohan ni Kongresista Radaza ang groundbreaking sa drainage system project sa national ug secondary road sa Mactan Circumferential Road nga nahimutang sa Barangay Babag.

Mokantidad ang proyekto og mokabat sa P19.6 milyones.

Niadtong Enero 15, laing drainage project ug pagpanindot sa dalan usab sa Barangay Bankal ug Mactan ang gipaubos sa groundbreaking.

Gigahinan kini og moabot sa P27.5 milyones sa pagpaningkamot sa kongresista.

Ang gitahasan sa pagpatuman sa proyekto mao ang Department of Public Works and Highways (DPWH) Cebu 6th Engineering office sa pag-implementar niini.

Nahukman ni Radaza ang paghatag og prayoridad sa mga drainage system gumikan kay di gusto ang kongresista nga masusama ang dakbayan sa kaulohan nga sa uwahing bahin sa miaging tuig, nakasinati og grabe nga pagbaha hilabi na sa mga flood prone area. (GCM)