Di maayong magpataka og padagan sa motorsiklo, labina sa kagabhion, kay kuyaw kaayo sa disgrasya.

Sama sa usa ka traysikol driver nga namatay human niya nadasmagan ang usa ka iro alas 9:35 sa gabii sa Biyernes, Marso 4,2022 sa national highway sa Brgy. Tapon, lungsod sa Dalaguete.

Si Romel Lenares Selerio, 48, taga Brgy. Poblacion, Dalaguete namatay diha-diha apil na ang iro nga iyang nadasmagan.

Si Major Gilfred Baroman, hepe sa Dalaguete Police Station nga nahinabi sa Superbalita Cebu, nagkanayon nga si Selerio kusog kaayo nakapadagan sa iyang motorsiklo padulong sa Brgy. Tapon.

Kay dili hayag ang karsada, wala siya makabantay sa iro nga libudsuroy nga kalit nga nilabang hinungdan nga iyang nadasmagan.

Tungod sa kakusog sa impact, nalabay si Selerio ug naugbok ang iyang ulo hinungdan sa iyang kamatayon.

Matod ni Baroman nga nagdali si Selerio kay duna untay importanteng tuyo sa Tapon.

Gihulagway sa kapulisan nga accident prone ang lugar hinungdan nga kanunay silang nagpahimangno sa mga motorista nga mag-amping sa pag-agi.

NAGBISEKLITA

Samtang hamtong nga lalaki nga nagbisiklita namatay human nabanggaan sa van alas 4:45 sa kaadlawon sa Biyernes sa national highway, Brgy. Pakigne, lungsod Minglanilla.

Gitanggong si Markj Lester Ondiano Panuncial, 26, ulitawo taga Brgy. Magtalisay, lungsod sa San Fernando, driver sa Nissan Urvan human niya nadasmagan si Joelito Callora, 46, dunay kapuyo, taga Sitio Imburnal, Brgy. Tubod, lungsod sa Minglanilla.

Si Callora patay nang niabot sa tambalanan.

Si Callora nagsakay sa iyang mountain bike dihang kalit nga niliko ug wa na malihayi ni Panuncial, kinsa gikan sa habagatang Sugbo ug padung sa norte.

Gumikan sa ka kusog sa impact, si Callora nakaangkon og grabing kadaot sa iyang ulo ug kalawasan.