USA ka drayber og habalhabal gipusil sa iyang kainom sa Sitio Sewage, Barangay Pusok, Dakbayan sa Lapu-Lapu kagahapon, pasado alas 2:00 sa kaadlawon, Septiyembre 16.

Ang biktima mao si Esteban Campasas Gemina, 30, dryaber og habalhabal ug molupyo sa Barangay Umapad. Dakbayan sa Mandaue.

Gitumbok nga nipusil kaniya mao si Argie Mansueto Barbaquel, hamtong ug molupyo sa Sewage sa Pusok.

Matod ni Police Major Aibert Jay Samson, hepe sa Police Station 5 sa Lapu-Lapu City Police Office (LCPO), si Gemina ug Barbaquel nag-inom dihang nahitabo ang krimen.

Naigo si Gemina sa iyang dughan hinungdan nga nahagba kini ug daling gidala sa tambalanan apan gideklarar nga dead-on-srrival (DOA).

Si Barbaquel dali nga misibat sa dapit ug padayon pa karong gipangita sa kapulisan.

Selos maoy posibleng motibo sa pagpamusil, sumala ni Samson, ilang nasuta nga si Gemina maoy kapuyo sa igsuon ni Barbaquel.

Giingong dugay na nga wala mopuyo sa Seawage ang igsuon ni Barbaquel ug miuban na kini ni Gemina sa Umapad gumikan kay kanunay manghagis si Barbaquel kung mahubog.

Apan mag-adtoan sila sa Sewage kay anaa nanimuyo sa lugar ang mga anak sa igsuon ni Barabquel sa kanhi niya karelasyon.

“Dugay na kuno ning nibahad sa biktima. Amo gisuwayan og bisita ang mga lugar nga posibleng tagoan sa suspek pero wala kini didto pero maglisod pud ni siya ug labang sa Guihilngan, Negros (diin taga didto ang suspek) kay kinahanglan man ta ug RT-PCR test..” matod ni Samson. (GCM)