USA ka balay suyupanan giguba samtang high value target nga nag-operate niini nasikop sa Philippine Drug Enforcement Agency (PDEA) 7 ug Provincial Intelligence Branch (PIB).

Laing lima usab ka mga tawo nga nasakpang nanuyop sulod sa drug den nasikop sa Barangay San Roque, Dakbayan sa Talisay.

Gihimo ang hiniusa nga buy-bust operation sa PDEA 7 ug PIB alas 8 Sabado sa gabii, Nobiyembre 2.

Subject sa operasyon ang usa ka senior citizen nga si Edilberto Endriga Jr., kinsa maoy nagmentinar sa drug den.

Naaktuhan nga naggamit sa ilegal nga drugas ang laing mga dinakpan nga sila si Ariel Abangan, 41, usa ka construction worker; Joseph Villa, 42, sales clerk; ug tulo ka mga tricycle driver nga sila si Roy Mahilum, 38; Richard Abangan, 41; ug Art Clinton Sabado, 27.

Matod sa tigpamaba sa PDEA-7, Leia Alcantara, nga sulod sa dul-an duha ka semana nga gipaubos sa surveillance si Endriga human sila nakadawat og report sa ilegal nga patigayon niini.

Gawas sa pagmentinar og drug den, giila usab nga HVT si Endriga, kinsa gihulagway nga makabaligya og shabu 20 ngadto sa 50 gramos matag semana.

Atol sa operasyon, nasakmit sa awtoridad ang 11 ka medium pack sa shabu nga adunay Dangerous Drugs Board value nga P88,600. (FMD, BBT)