GIDEKLARAR nga dead-on-arrival ang usa ka lalake nga giilang high value target (HVT) sa kapulisan sa Dakbayan sa Mandaue gumikan sa kalambigitan sa illegal nga drugas ug pagkalambigit sa laing drug personality nga napatay sa miaging tuig sa maong dakbayan.

Napuno sa samad pinusilan ang lawas sa biktima nga si Joel Monteroso Oujano, 47, taga sitio Tinago sa nahisgutang barangay.

Base sa nakuhang kasayuran sa kapulisan, nagsakay sa iyang bisikleta si Oujano padulong na unta mopauli sa ilang balay.

Giingong duha ka mga mamumuno luwan sa usa ka motorsiklo nipusil kaniya sa dalan AC Cortes, Brgy. Alang-Alang sa nahisgutang syudad.

Sa pakisusi sa kapulisan, duna siyay record diin nasikop siya sa kaso nga may kalambigitan sa paggamit og illegal nga drugas sa miaging tuig.

Apan wa siya mapriso og dugay kay nakapyansa ra dayon.

Gibutyag ni Police Lieutenant Colonel Ryan Devaras nga posibleng dunay nagbaton og kalagot kang Quijano, ilabi na nga nahimo niyang lider si Dabilo Olivar sa buhi pa.

Si Olivar gipusil patay niadtong Oktubre 2018 duol sa iyang gipuy-an sa Barangay Alang-Alang.

Si Olivar gihulagway kaniadto nga high value target.

“Usa sab niana kay anaa siya sa illegal drug trade. Normal nana nga kon kriminal ka, so naa gyuy possibilities nga naay maglagot or ba kanang naa kay connection sa druglord”, matod ni Devaras. (ANV)