PATAY ang usa ka 56-anyos nga drug personality sa Sugarland, Sitio Kimba, Barangay San Roque, dakbayan sa Talisay human "misukol" sa gilusad nga buy-bust operation sa mga sakop sa Regional Mobile Force Battalion (RMFB) 7, Dominggo, Pebrero 24.

Ang napatay mao si Daniel “Danny” Dumandan Mañacap, 56, giingong usa ka maintenance personnel sa Sugarland (usa ka cockpit arena) ug molupyo sa Sitio Kimba, Barangay San Roque, dakbayan sa Talisay.

Nangulo sa buy-bust operation si Inspector Jan Ace Elcid Layug, inabagan sa mga sakop sa Talisay Police Station.

Sigun sa report sa RMFB 7 nga sa dihang napalitan na ang suspek, nakabantay kini nga pulis ang iyang gibaligyaan, hinungdan nga mikuha kini og armas ug gipusil ang mga operatiba.

Dali nakabawos ang mga pulis nga miresulta sa iyang pagkaigo ug namatay diha dayon.

Nakuha sa kapulisan ang 55 ka gagmay nga pakete sa gituohang shabu nga motimbang og 2.24 grams ug mobalor sa P15,232. Nakuha sad ang armas nga gigamit sa pagpamusil.