ISIP nag-unang ahensiya sa kagamhanan nga responsable sa pagpanalipod sa mga bata, ang Department of Social Welfare and Development (DSWD) Field Office VII nitubag sa panawagan sa pagluwas sa usa ka bata nga biktima sa pag-abuso taliwala sa panahon nga nagdumala sa dakong responsiblidad ang ahensiya sa pagpatuman sa social amelioration program (SAP) ning tuiga.

Ang operasyon nagsugod dihang ang grievance team sa DSWD-7 Operations Action Center nakadawat og mensahe a DSWD-7 official Facebook page bahin sa mga bata nga giabusohan sa online panahon sa enhanced community quarantine (ECQ) samtang nagpadayon usab ang SAP payout.

Ang mga taho giduso dayon sa Women and Children Protection Center - Visayas Field Unit (WCPC- VFU) sa Philippine National Police (PNP) alang sa imbestigasyon.

Human sa pagpaniid, ang giingong online exploitation sa usa ka bata nakompirmar.

Sa Mayo 28, ang WCPC- VFU team ubos sa pagpangulo ni PLTCOL Mary Grace R. Madayag ug DSWD-7 niluwas sa bata nga biktima sa online sexual exploitation of children (OSEC) sa Sitio Rio, Barangay Lahug, dakbayan sa Sugbo.

Sumala sa rescuers, ang 13-anyos nga babaye, gikan sa usa ka pamilya sa dapit ang gikuhaan og hulagway nga hubo sukad niadtong 2018 ug ang mga hulagway gipadala sa online bugti sa salapi.

Ang bugaw sa bata silingan ug suod sa pamilya hinungdan nga wala kini madudahi sa mga ginikanan.

Ang bugaw maoy nipadala sa mga hulagway sa bata nga hubo ngadto sa iyang bana nga Amerikano nga kasamtangang tua nagpuyo sa US.

Sa pagkakaron, ang bata ubos sa kustodiya sa DSWD-7. Gihatagan og temporaryong pinuy-anan, pagkaon, psychosocial counseling ug hygiene kit samtang ang kaso nagpadayon. (PR)