LAING ihap sa mga armas ang gipangtahan ngadto sa kapulisan sa nagpadayon nga kampanya sa loose firearms.

Niadtong Biyernes, Disyembre 20, dugang 14 na usab ka mugbo nga mga armas ang gipangtahan gikan sa mga sibilyan nga mga molupyo sa nagkadaiyang mga barangay sa Sapangdaku, Kalunasan, Busay, Budlaan, Apas, Lahug, Guadalupe, Mabolo ug Barrio Luz.

Kini nga mga barangay personal nga gipangbisita sa mga sakop sa City Force Mobile Company (CFMC).

Nasuta sa kapulisan nga way mga dokumento ang mga tag-iya sa maong mga armas, hinungdan nga gihingusgan karon sa kapulisan ang paghangyo sa katawhan labi na kadtong nanag-iya og armas nga walay mga papelis.

Ang maong kalihukan subay sa pagpaningkamot ni P/Lt. Col. Randy Korret, labaw sa CFMC sa CCPO.

Ang mga armas naglangkob sa .38 revolver, walo ka mga armas nga magnum 22 revolver, usa ka 5.56mm Bolt Action Rifle ug magnum 22 rifle ug uban pa, lakip na sa mga bala.

Si Korret nihangyo sa mga sibilyan subay na sa direktiba sa kadagkuan sa kapulisan sa nasod ug ni Presidente Rodrigo Duterte sa pagpakunhod sa kriminalidad. Kini maoy nalatid sa Executive Order 70, End Local Communist Armed Conflict (ELCAC).

Ang mga residente mipahibawo kanila sa mga gipangdudahan nga naghawid og mga armas nga way dokumento. (BBT)