SISTERHOOD agreement proposal sa siyudad sa JinJiang, China alang sa patinabangay ug pagtukod og mga negosyo nga makapalambo sa turismo ug panudlanan sa duha ka mga siyudad gidawat sa mayor sa Siyudad sa Lapu-Lapu, Junard “Ahong”Chan.

Positibo nga gidawat sa mayor sa siyudad sa Lapu-Lapu, Junard “Ahong” Chan, ang sisterhood proposal pinaagi sa suwat nga gipresentar sa Bise Mayor sa JinJiang, Wang Wenhui, Huwebes sa buntag sa session hall sa dakbayan.

Matod sa mayor nga pinaagi sa sabot, mas molambo pa ang revenue sa Siyudad tungod sa mga proyekto ug negosyo nga pabarugon sama nalang sa negosyo sa barato nga construction materials, pag export og mga shell ug sea cucumber products ingon man direkta nga mga flights gikan sa JinJiang padulong sa Sugbo ug ang padayon usab nga paglambo sa turismo sa syudad.

“Mo-invest sila og negosyo sa atoang siyudad unya kita mag-supply sad ta sa ilaha kita naa man tay sea cucumber which ilang gikinahanglan, mga fashion accessory sab ingon ana,” matod ni Chan.

Dugang ni Chan nga dili hinuon ni maoy unang higayon nga mobutang ang mga negosyante sa JinJiang ug negosyo sa Lapu-Lapu tungod kay may mga Chinese-Filipino na nga mga negosyante nga namuhunan sa syudad.

Gilaraw nga mabuksan ang bag-ong flights sa sunod buwan.

Kini usa sab sa paagi sa JinJiang nga madala ang mga turistang Insik dinhi sa Sugbo.

Giklaro ni Chan nga ang kasabutan nila mao lang ang pagnegosyo ug wala’y nalatid nga nagtugot kanila pagtrabaho sa syudad.

Ang maong kalihukan gitambongan usab sa mga Chinese students sa nagkalain-laing English learning school sa siyudad. (ANV)