DUHA ka adlaw human nasakmit ang labing dakong kantidad sa ilegal nga druga ning tuiga sa Zambales, ang kapulisan nakasakmit na usab og dul-an sa P1.6 bilyunes gikan sa “top level” nga tawo sa illegal nga druga niadtong Huwebes sa gabii, Septiyembre 9, 2021.

Sila si Basher Bangon, 59, taga Cagayan de Oro City, ug Danilo Untavar, 51, napatay sa drug bust sa Springville Executive 1, Molino 3 sa Bacoor sa alas 7:00 sa gabii sa Septiyembre 9, sumala sa Philippine National Police (PNP) Drug Enforcement Group (DEG) kagahapon, Septiyembre 10.

Sumala sa kapulisan, si Bangon maoy ‘top level drug personality’ nga tinubdan sa illegal drugs gikan sa usa ka sindikato nga Insek alang sa pag-apud-apod sa Kabisay-an ug Mindanao.

Nakuha gikan sa mga suspek mao ang 181 kilograms sa gidudahang methamphetamine hydrochloride (shabu) nga gibanabana nga dunay street value nga mobalog og P1.25 bilyunes.

Sa usa ka follow up operation sa alas 9:15 sa gabii sa Barangay Magdalo, Bahayang Pagasa sa Imus, ang mga operatiba sa DEG nisikop sa kauban ni Bangon nga giila nga si Lani Micoleta, 45, ug iyang bana nga si Aldwin, 47.

Nakuha gikan sa magtiayon mao ang 48 kilograms sa shabu nga mobalor og P331.2 milyunes.

Sumala sa kapulisan, ang magtiayon nagpadalan sa illegal drugs nga negosyo sa National Capital Region ug Calabarzon (Cavite, Laguna, Batangas, Rizal ug Quezon).

Si PNP Chief Guillermo Eleazar nagkanayon nga ang duha ka mga operasyon kabahin sa follow-up drug sa malampusong ronda sa dakong kantidad sa druga niadtong Martes, Septiyembre 7, sa Zambales ug Bataan diin upat ka mfga Chinese national ang napatay ug tulo ang nasikop. (SunStar Philippines)