USA ka construction worker nga adunay pending warrant of arrest sa kasong rape nadakpan sa mga sakop sa City Mobile Force Company (CMFC) sa ilang balay sa lungsod sa Daanbantayan, Sugbo kagahapon sa kaadlawon, Huwebes, Pebrero 20.

Ang dinakpan giila nga si Ariel Arriesgado Cuyos, lumad nga taga barangay Maya, Daan Bantayan.

Ang warrant giluwatan ni Judge Marlon Jay Moneva sa RTC branch 20 sa dakbayan sa Sugbo sa kasong pagpanglugos ug way pyansa nga girekomendar ang korte.

Giingong nahitabo ang pag pang lugos niadtong 2017 sa barangay Talamban sa dakbayan sa Sugbo diin ang biktima 15 anyos pa niadtong tungora.

Matod ni Police Lieutenant Colonel Randy Korret, hepe sa CMFC sa Cebu City Police Office (CCPO), nga ilang gipang-monitor ang mga pending warrant of arrest gikan sa korte ug ilang na monitor ang akusado nga naa kini sa Maya nagtagutago ug ila dayon kining giadto.

Nalakip si Ariel Cuyos sa number 1 most wanted person sa Talamban police station human nagtagutago sulod na sa kapin duha ka tuig.

“Actually pangalawang alias warrant of arrest na yan eh, kase na release yung warrant of arrest year 2018 last year nag labas ulit ang korte. Nung ni research namin sa pag build up ng case ang sabi sa amin nasa Talamban yung accused pero hindi nag pipirme duon,” matod ni Korret.

Gihimakak ni Ariel ang pasangil kay, matod nita, igo ra ni gakos kaniya ang biktima ug wala niya kini hilabti.

Matod niya nga nagbaktas siya sa ngitngit apan kalit lang nga miduol kaniya ang dalaga ug migakos kaniya sa pagtuo nga siya ang uyab niini.

“Gikan ko sa balay sa akung ig-agaw kay nanihapon pag balik nako padung sa manokan ang babaye ni duol ra sa akoa ning gakos kay na a-an ko niya nga uyab,” matod ni Ariel Cuyos.

Nagtuo siya nga wala pasakaig kaso sa biktima tungod kay wala siya padalhig summoned gikan sa korte.

Natingala nalang matod pa siya nga aduna nay warrant alang kaniya nga walay gitugot nga pyansa ang korte.

Samtang, usa ka 27 anyos nga taga lungsod sa Liloan ang mireklamo sa Parian police station human lugosa sa usa ka langyaw sulod sa hotel sa dalan E. Chavez, Barangay Lorega, dakbayan sa Sugbo.

Ang langyaw nga iyang gipasanginlan sa usa ka Swedish national, 25, kasamtangan nga nagpuyo sa usa ka hotel sa Barangay Lorega.

Matod sa biktima nga pasado alas 2 niadtong miyerkules sa kaadlawon, Pebrero 19, padung na unta siya nga mo sulod sa kwarto nga iyang gi abangan sa hotel kalit lang, matod pa, siya nga gitulod pasulod sa langyaw. Gihuboan pa siya niini samtang nag sige'g panghikap sa pribadong bahin sa iyang kalawasan.

Nakuha gyud ang pagka babaye ni Shaira (dili tinuod nga pangalan) apan human mapahimusli dali kini nga migawas sa lawak ug misibat.

Matod ni Police Major Armando Labora, hepe sa Parian police station, nga hangtod karon wala pa madakpi ang maong langyaw ug nakig -alayon na usab sila sa hotel nga kasamtangan nga giabangan niini. (AYB)