PASAKAAN gyud og kaso si Konsehal Niña Mabatid sa kapulisan sa Dakbayan sa Sugbo human nag-post sa iyang Facebook account nga adunay tulo ang namatay sa dakbayan tungod sa gidudahan nga coronavirus disease 2019 (Covid-19) bisan walay kompirmasyon gikan sa Department of Health (DOH).

Matod ni Police Colonel Hector Grijaldo, hepe sa Cebu City Police Office (CCPO), nga didto sila Miyerkules, Marso 25, 2020 sa balay ni Mabatid apan wa kini moatubang gawas sa iyang abogado.

Nakig-alayon na usab sila sa Regional Anti-Cyber Crime Unit 7 uban sa mga ebidensya nga isukip sa complaint.

Ang mga ebidensya nga naa ang kapulisan mao ang screenshots sa post ni Mabatid nga aduna nay tulo ang namatay nga posibling nataptan sa Covid-19 sa siyudad sa Sugbo.

Giingong mihimakak si Mabatid pinaagi sa iyang abogado nga aduna siyay nahimong kalapasan sa balaod nga maoy hinungdan nga didto nalang sa korte sila patubagon sa salaod nga nahimo niini.

Nakita na usab sa Cyber-Crime Unit ang mga ebidensya ug matod niya nga adunay mga elemento nga mahimong mapasaka ang kaso ngadto sa korte.

“Accordingly the anti-cyber crime unit has the reason now to file a formal charge kase alam na nila kung anong mga elements na nanduon eh,” matod ni Grijaldo.

Mipasabot si Grijaldo nga nag atubang karon ang tanang katawhan sa krisis ug angayan nga ang gobyerno ug ang publiko magtibangay dili maghimo og mga impormasyon nga makapadugang sa kahadlok sa kadaghanan.

Adunay gilatag nga protocol ang gobiyerno kung unsay angayan nga buhaton ug nasayod niini ang konsehala nga adunay standard ang gobyerno kung kinsa lamang ang makahatag sa impormasyon.

“That is not good attitude being a public official. We need or we are obliged to do something, we are obliged to follow rules and there is a standard, there is a protocol to follow,” matod ni Grijaldo.

Bisan nga gipangpapas na ni Mabatid ang iyang mga post sa Facebook page, ang sreenshots igo na nga ebidensya nga sa kaso ngadto sa korte.

Una nang nanawagan ang Police Regional Office (PR0) 7 Director sa publiko nga likayan ang pagpakatap sa dili pa kompirmadong impormasyon sa social media aron dili mag-atubang og kaso. (AYB)