ANG wa pagtuman sa locators sa Mactan Economic Zone (MEZ) sa kasabutan tali sa kagamhanan sa Dakbayan sa Lapu-Lapu, hayan modeklarar si Mayor Junard Chan og temporaryong pagpahunong sa operasyon sa tulo ka mga dagkong economic zone sa siyudad.

Gibana-bana nga moabot og 100,000 ka mga trabahante sa MEZ1 nga nahimutang sa Barangay Pusok, MEZ2 sa may Tamiya - Basak ingon man ang Cebu Light Industrial Park nga nahimutang sa Barangay Basak.

Kini human nga nabantayan ni Chan nga niadtong Lunes sa hapon, Marso 23, nangatanggong ang bagang tapok sa mga trabahente sa MEZ1 nga nagpaabot og kasakyan sa ilang pagpamauli.

“Wa sila (locators) motuman sa among sabot nga mo-provide og transportation sa ilang workers,” asoy ni Chan sa dihang nahinabi sa Superbalita Cebu.

Napungot ang mayor sa dihang gipahugtan sa kagamhanan ang pag-restrict sa senior citizens, minors sa gipatuman nga curfew ingon man ang pagmando sa temporaryong pagsira sa mga nagkdaiyang establisemento aron kalikayan nga mokuyanap ang makatakod nga coronavirus disease.

Apan ang mga manucfaturers sa economic zones nagkuwang ngadto sa ilang mga kawani.

Sa miaging semana, nipatawag og tigum si Chan sa kadagkuan o locators sa maong mga economic zone, diin sila nihangyo nga makapadayon sa ilang operasyon pinaagi sa skeletal force.

Nitugot ang mayor sa awhag sa kondisyon nga motuman ang tanang locators sa protocol sama sa pagpa-ubos sa ilang tagsa-tagsa ka mga empleyado sa thermal scanner, paggamit og alcohol, usa ka metros nga distansiya sa trabahoan, mobutang og isolation room alang niadtong adunay magluya ug ang pagtagana og transportasyon sa mga trabahante sa ilang pagpa-ingon ug pauli gikan sa ilang trabahoan.

“We can’t afford nga dunay mag-positve (COVID-19) dire sa atoa. Unsa may atong pili-on ang panginabuhian o kinabuhi?,” saysay sa mayor.