ON call nga electrician nga taga Sityo Adelfa, Barangay Bulacao, Siyudad sa Sugbo, nasikop atol sa buy-bust pasado alas 9:00 sa Miyerkules sa gabii. Nobiyembre 17, 2021.

Ang nasikop sa mga sakop sa Regional Police Drug Enforcement Unit (RPDEU), nga gipangulohan ni Police Major Joffre Grande, team leader, mao si Patrocinio Vargas, 44, nagpuyo sa dapit.

Si Vargas nasakmitan og shabu nga moabot og 60 gramos nga mobalor og P408,000 base sa iyang street drug price value.

Si Police Liuetenant Colonel Ronnie Failoga, pangu sa RPDEU, nibutyag sa Superbalita Cebu nga si Vargas ilang gimonitor sulod sa usa na ka semana human ilang madakpan ang usa sa iyang natagakan og shabu.

Dugang ni Failoga nga si Vargas makonsidera usab nga city level high value target tungod sa kalapdon sa iyang hatdanan og illegal drugs.