Human sa grabeng baha nga nasinati sa pipila ka mga barangay sa lungsod sa Minglanilla niadtong Sabado sa hapon, Oktubre 8, atol sa pagbunok sa uwan, si Mayor Rajiv Enad nakigtagbo sa municipal engineer sa Lunes sa buntag, Oktubre 10 aron hisgutan ang mga pamaagi sa pagpaminos sa risgo.

Si Enad nasayod nga ang mga agianan sa tubig, apil na ang kasapaan, ubos sa jurisdiction sa Department of Public Works and Highways (DPWH), apan matod sa mayor nga di na siya makahuwat kon unsa nga lakang ang pagahimuon sa nasudnong ahensya.

Sa ilang panagtagbo ni Municipal Engineer Joselito Nacario, si Enad nimando gilayon sa pagtukod og retaining walls ug riprap sa sapa labina sa Brgy. Tungkil, kansang sapa nisuyla pag-ayo atol sa pagbunok sa uwan niadtong Sabado.

Matod niya nga taliwa sa kagamay ra sa pundo sa panudlanan sa lungsod, gikinahanglan ang dinaliang lakang tungod sa dakong risgo ngadto sa mga lumolupyo matag bunok sa uwan.

Wa man tuoy namakwit tungod sa baha, apan dunay pipila ka mga binuhing hayop nga nangaanod niadtong Sabado base sa mga social media post sa mga lumolupyo.

Sa iya usab nga state of the municipal address sa miaging semana, ang pagsulbad sa suliran sa baha usa sa mga prayoridad sa mayor. (REV)