GIPATAY una ang engineer sa wa pa gikuha ang iyang mga bulawang alahas sa tulo ka mga tawo nga nagmotorsiklo samtang nagpalit og pagkaon aron unta ipanihapon niadtong Sabado sa hapon.

Ang biktima ig-agaw ni Lapu-Lapu City Vice Mayor Marcial Ycong.

Giila sa Homicide investigator sa Lapu-Lapu City Police Office nga si Arsenio Ybañez Ycong, 52, civil engineer, contractor, taga-Sityo Mustang, Barangay Pusok sa naasoyng dakbayan.

Matod ni Superintedent Eloveo Marquez, hepe sa Investigation Detective and Management Branch, nga ang motibo nga ilang nakita sa pagpatay ni Ycong mao ang tulis.

“Pwede siya gi-plano or instant (pagpatay ug pagtulis),”matod ni Marquez.

Nipalit si Ycong og pagkaon sa usa ka kan-anan sa Sityo Bliss, Barangay Pajac mga alas 5:12 sa hapon niadtong Sabado.

Sa dihang mosakay na unta og balik sa iyang nakaparada nga multicab, adunay motorsiklo nga gisakyan og tulo ka mga lalake nga wa mag-helmet ang way pagpanagana nga mipusil sa enhinyero.

Sa pagkahagba ni Ycong, dali nga nanganaog ang duha ka angkas ug dali nga gipanguha ang bulawang kwintas ug bracelet sa biktima, samtang wa pa matino ang kantidad sa maong mga alahas.

Igo sa ulo maoy hinungdan sa hinanaling kamatayon ni Ycong. FVQ