USA ka estudyante ang nakaani og pagsuway sa social media human nag-viral ang usa ka video diin makit-an nga nag-drive kini og sakyanan sa Dakbayan sa Lapu-Lapu nga padulong sa iyang tunghaan nga nagwang-wang.

Gikatakda nga i-surrender mismo ni Lapu-Lapu City Mayor Junard “Ahong” Chan sa Land Transportation Office (LTO) ang lalaki karong Lunes, Enero 27, 2020.

“I-surrender daw ni Mayor Ahong this Monday morning sa LTO,” matod ni LTO Central Visayas Regional Director Victor Caindec.

Base sa caption gikan sa nag-viral nga Instagram story, daw late na ang lalake sa iyang exam nga nagtungha sa usa ka aeronautic school sa Lapu-Lapu.

Ang account nga “JasmineKingChan” mao ang ni-upload niini samtang gituohan nga iya sa lalake ang account nga “jnspencer21” nga mao'y ga-share niini.

Sigon sa mga netizens ang account nga "JasmineKingChan" panag-iya sa anak sa mayor, kinsa usa ka appointed nga konsehal sa Barangay Pajo, Dakbayan sa Lapu-Lapu. Ingon man ang lalaki, uyab niini.

Base sa video, nakasuta si Caindec og kalapasan sa maong lalake og reckless driving, failure to wear seatbelt ug kalapasan sa Presidential Decree 96 o ang "anti-wang-wang" nga balaod.

Sa iyang bahin si Chan, nagkanayon nga dili nila i-tolerate ang maong kalapasan bisan paman og nalambigit ang higala niini o miyembro sa pamilya.

“As mayor, I condemn the viral video which allegedly happened here in Lapu-Lapu City. I call upon LTO to conduct an investigation to identify and penalize the traffic violator therein. As the father of the city, I will extend my full support to LTO in their quest for the truth. My administration will not tolerate such abuse whether it involves a friend or a family member. We hope to get to the bottom of this very soon,” sa opisyal nga pamahayag ni Chan. (HBL)