EX-convict nasuko nga wala pautanga ang iyang asawa, iyang gisuwayan pagpusil ang lending kolektor alas 11:30 sa buntag sa Biyernes, Disyembre 10, 2021 sa Purok Pansat, Brgy. Tajao, lungsod sa Pinamungajan, Sugbo.

Si Francisco Utlang Inoc, 65, minyo, drayber sa traysikol, nisuway pagpusil kang Ian Lanoza Flores, 25, ulitawo, product assistant sa Coolway Multipurpose Cooperative nga tigpautang, apan nalayog sa nauwahi.

Human niya malupig ug nailog ang pusil, iyang gi-turnover si Inoc ngadto sa ningresponde nga mga pulis.

Si Police Major Vincent Zozobrado, hepe sa Pinamungahan Police Station nga nahinabi sa Superbalita Cebu, nagkanayon nga si Inoc naglagot kang Flores kay nipahibawo sa ilang opisina nga dili maka-reloan ang asawa niini kon dili bayran ang loan sa ilang anak.

Gumikan niini, wala ma-release ang loan sa asawa ni Flores.

Iyang giatangan si Flores ug pusilon unta gamit ang pusil nga Frontier nga ang bala sa M16 Armalite rifle.

Maayo gani kay nakabantay si Flores, iyang nalayog si Inoc ug nag-inilugay sila sa armas.

Nalupig ni Flores si Inoc kay tiguwang na, iyang nakuha ang armas ug gi citizen’s arrest ang tiguwang.

Sa pag-abot sa mga pulis, gipusasan gilayon si Inoc dayon gidala sa police station ug gibalhiog.

Si Inoc nipadayag nga wala siya magmahay sa iyang gihimo.