ANG Cebu City Government mohatag sa tag P2,000 nga financial assistance ngadto sa 80,000 ka mga senior citizen para sa buwan sa Marso ug Abril.

Si Mayor Edgardo Labella nagkanayon nga di maka-release ang City Hall sa P2,000 karong Marso nga mo-cover sa buwan sa Marso ug Abril gumikan sa rules sa Commission On Audit (COA).

Ang mayor ni-target sa unang adlaw sa Abril, apan gipadayag ni Labella nga daghan ang mga papelis nga andamon labi na ang pagpirma sa 8,000 ka papel diin labing minos tulo ka departamento ang mopirma.

Si Labella niumol og ad hoc committee nga gipangulohan ni City Administrator Floro Casas, City Attorney Rey Gealon ug mga konsehal nga gilangkuban nilang Raymond Garcia, Niña Mabatid, Dondon Hontiveros ug Joel Garganera.

Gitukod kini sa mayor sanglit sila ang mohimo sa pamaagi sa distribution taliwa niining padayon nga hulga sa Covid 19.

Matod sa mayor nga kinahanglan ipatuman ang social distancing ug sundon ang mga protocol gikan sa Department of Health.

Human sa senior citizen, isunod usab og hatag pagkasunod semana ang P2,000 alang persons with disabilities.

Ang senior citizen ug PWD adunay tag 12,000 nga madawat nga ayuda gikan sa siyudad matag tuig kon P1,000 matag buwan. (PAC)