Subling gipadayag ni Lapu-Lapu City Mayor Junard “Ahong” Chan nga ang floating cottages wala gihapon gitugot sa kadagatan sa dakbayan.

Kini bisan sa pangangkon sa mga tag-iya nga ang floating cottages dunay pagtugot gikan sa barangay.

“Well, if the barangay had given its permission, it still has to go through the City. So, if the barangay will give clearance, they need a business permit. If they do not do have a business permit, they cannot operate,” matod ni Chan.

Si Alex Baring, pangulo sa City Agriculture and Fisheries Office, sa sayo pa, nisaysay sa SunStar Cebu nga ang tulo ka floating cottages nga nakaangkla sa baybayon sa Barangay Subabasbas ug usa sa Punta Engaño, Agus ug Marigondon.

Matod ni Baring, nangayo na siya sa operators sa pagpakita sa written approval gikan sa mga barangay.

Ang floating cottages gikan sa silingang lungsod sa Cordova, diin ang ilang operasyon temporaryong gipahunong sukad sa kataposan sa Agusto alang sa rehabilitasyon sa polluted seawater.

Ang unregulated establishment sa floating ug fixed cottages sa kadagatan sa Cordova gibasol sa taas nga fecal coliform (bacteria gikan sa hugaw sa tawo) level sa dagat nga nilapas sa allowable level.

Si Chan nagkanayon nga dili siya gustong mahitabo kini sa Lapu-Lapu City ilabi na nga ang coastal area sa dakbayan maoy nag-unang economic driver tungod sa white sand beaches ug tin-aw nga baybayon.