Gidayeg ni Secretary Carlito Galvez ang Cebu City Quarantine Center (CCQC) atol sa iyang pagbisita sa pasilidad sa Biyernes, Hunyo 12, 2020 sa North Reclamation Area, Dakbayan sa Sugbo.

Si Galvez, chief implementer sa Inter-Agency Task Force for the Management of Emerging Infectious Diseases, giubanan ni Mayor Edgardo Labella aron makakita sa pasilidad nga giandam sa Dakbayan para sa mga adunay sakit nga Covid-19.

Ang CCQC alang sa mga dunay Covid nga mild to moderate.

“He was very impressed with our facility and he said even Manila does not have this kind of facility,” paghulagway ni Labella sa sulti ni Galvez.

Ang mga pasyente makuha sa ilang vital signs nga way physical contact tali kanila ug sa mga medical personnel.

Ang CCQC nga usa ka negative air-pressure facility ug gigastohan og kapin P50 milyones sa City Government, nag-atiman na karon og 40 ka pasyente.

Si Cebu City Medical Center (CCMC) hospital administrator Yvonne Cania, kinsa maoy nagdumala sa CCQC, nagkanayon nga 24 ka mga lalake ug 16 ka mga babaye naa karon sa maong pasilidad nga ilang giatiman.

Ang CCQC adunay portable X-ray, pulse oximeter, digital high blood pressure ug standby nga mechanical ventilator ug intubation sets, mini laboratory ug gipalibutan sa 30 ka mga closed circuit television (CCTV) camera.

Ang CCQC nga adunay 166 ka beds gituyo pagtukod sa Dakbayan sa Sugbo isip pagpangandam sanglit kon adto malandig sa private ospital, dagko kaayo og bayranan ang mga pasyente. Diha sa CCQC, libre apil na ang ilang mga pagkaon, vitamins ug intervention sa mga doktor. /