GIPAHINUMDUMAN ni Gobernador Gwendolyn Garcia ang publiko nga usa lang ka quarantine pass ang ihatag matag balay ug libre kini nga ipang hatag.

Mao kini ang gitataw ni Garcia Dominggo sa hapon, Marso 29, atol sa gipahigayong press conference sa kapitolyo.

Gikatakda nga ipatuman sa lalawigan sa Sugbo ang enhanced community quarantine sugod alas 12:01 sa kaadlawon, Marso 30, isip usa sa mga lakang batok sa pagkatap sa coronavirus disease (Covid-19)

Matod ni Garcia nga ang mga local government unit sa lalawigan ang maoy mang apudapod sa mga quarantine passes.

Giklaro sa gobernadora nga ang hatagan lang og vehicle quarantine pass mao ang mga nalakip sa listahan sa mga exempted.

"Ayaw dumuga ang mga opisina sa mayor kay mangayo mo ug vehicle pass. Kay hinumdomi wa na guy public transport mao na nga ang katong mga exempted kinahanglan mo ug vehicle pass kay wa naman tay public transport," asoy ni Garcia.

Gipasabot usab ni Garcia nga gikinahanglan nga striktuhon ang paglimita sa mga kalihukan sa publiko aron mapugngan ang pagkatap sa Covid-19.

"Let us stay ahead of the curve. Let's not wait for the peak. Let's not even allow this to peak. Samtang kita ta nga nagsaka, for the rest of the province, let's protect the province," asoy ni Garcia.

Niabiso si Garcia ngadto sa publiko lakip na ang mga pribadong kompaniya nga padayon nga motabang sa gibuhat nga lakang sa gobyerno aron maprotektahan ang matag usa batok Covid-19.

"Please tabangi ang atong mga local government units, please supermarkets you can also do your share," asoy sa gobernadora. (RTF, ANV, KST, NDT)