ARON mas sayon ang pagbisita sa mga turista sa lalawigan sa Sugbo, gihimug-atan ni Cebu Governor Gwendolyn Garcia nga duha lang ka mga rekisitos ang kinahanglan ipakita sa mga turista aron makasuroy.

Kini mao ang confirmed booking sa online portal sa Kapitolyo o hotel confirmation ug ticket.

Atol sa pormal nga pagbukas sa turismo sa lungsod sa Sta. Fe, Isla sa Bantayan, si Garcia nagkanayon nga di angay lisod-lisuron sa mga dokumento ang mga turista nga ang tuyo mao lang ang pagbisita sa tourist spots sa lalawigan.

Kini subay sa kabalaka sa mga tour operator gumikan sa hugot gihapon nga quarantine protocol sama sa giingong pagdala og medical certificate.

Gisugyot sa Provincial Tourism Task Force (PTTF) nga ang confirmation sa online portal maoy mag palahi kanila sa mga locally stranded individual (LSI), authorized persons outside residence (APOR) ug oversease Filipino workers (OFW).

Sa nasabutan, ang tanan nga mga turista nga mosakay sa Hagnaya Port sa San Remigio kinahanglan lang mangayo og QR code sa ilang confirmed booking aron makasakay sa barko.

Kini subay sa paglusad usab sa turismo sa lungsod.

Gilauman nga modagsa pa ang mas daghang turista sa lungsod ug Isla sa Bantayan karon nga duna nay airport nga buksan alang sa mga mo bisita.

Sa Oktubre 17, gi-pangulohan ni Cebu Governor Gwendolyn Garcia ang pagsusi sa airport.

Malipayon si Garcia nga natuman na ang usa sa iyang mga plano kaniadto nga paghimo og airport sa lugar alang sa pagpalambo sa turismo sa isla. (ANV)