NAANGOL ang wala nga bahin sa hawak ni Cebu Governor Gwendolyn Garcia human nadakin-as sa iyang balay niadtong Sabado, Agusto 15, 2020.

Tungod niini, gikinahanglan sa gobernador nga mag walker o magsungkod una kon molakaw sulod sa pipila ka mga semana samtang naa pa siya sa therapy, matod ni Dr. Christina Gianggo, pangu sa Provincial Health Office (PHO) sa Lunes, Agusto 17,2020.

Giklaro ni Gianggo nga maayo ang kahimtang sa gobernador, apan gikinahanglan nga mopailawom siya sa therapy.

Gikinahanglan usab ni Garcia nga mopailawom sa laing x-ray mga duha ka semana gikan karon aron pagsuta sa kahimtang sa iyang hawak.

Matod ni Giango nga gikinahanglan ni Garcia ang medical attention tungod sa angol sa hawak.

Ikaduha na kini mahitabo kang Garcia, 64, kay niadtong 2016, human siya nadakin-as, naangol usab ang iyang hawak.

Unom ka mga semana nga gikinahanglan ni Garcia nga mag walker samtang sa ikapito ug ikawalong semana magsungkod siya.

"She's okay she'll be back to work tomorrow but kinahanglan na siya mag walker sulod sa six weeks. Pero okay ra siya nagpahulay sa sa iyang balay," matod ni Gianggo. (ANV)