NABALAKA ang deputy chief implementer sa Emergency Operations Center (EOC) sa Dakbayan sa Sugbo sa dagan sa coronavirus disease (Covid-19) transmission sa nakalabay nga pito ka mga adlaw sa Nobiyembre.

Si Cebu City Councilor Joel Garganera niingon nga sa mao nga mga adlaw, mas daghan ang nangatakdan kay sa nangaulian kun recoveries.

Iyang gibutyag nga dunay 13 nga nangatakdan ug ang makapahadlok kay kini nagagikan sa 11 ka mga barangay.

Si Garganera nipasabot nga ang naghatag niini og kakuyaw mao nga katag ang mga tawo nga nangatakdan, pasabot nga lapad ang mga dapit diin kini nahitabo.

“Wala man hinuon silay common transmission but kani siya hilab ni siya,” matod ni Garganera sa interbyu sa Superbalita Cebu.

Siya nipasabot nga mas sayon ang pagsubay sa transmission kon usa ra ka pamilya kay first generation ang matakdan.

Nisamot ang kahadlok ni Garganera kay sa Nobiyembre 11, niabot og 28 ang nangatakdan sa SARS-CoV-2, kagaw nga nagdala sa Covid-19 nga nagagikan sa 10 ka mga barangay sa Dakbayan sa Sugbo.

“Basin sa di pa ron mahumang buwana, ma-lockdown ta,” pahimangno ni Garganera sa mga Sugboanon.

Masaligon siya nga sa di pa matapos ang Nobiyembre 12, mahuman na ang contact tracing sa mga close contact sa mao nga mga pasyente.

Iya usab nga gibutyag nga dunay unom ka mga tawo nga nagpositibo sa kagaw nga nagagikan sa laing mga lalawigan nga nianhi sa dakbayan sa Sugbo.

Busa awhag ni Garganera sa mga Sugboanon nga motamod sa mga health protocol ug sundon ang tanang mga pahimangno sa kagamhanan. (PAC/REV)