KATABANG sa usa ka pamilya sa lungsod sa Alegria, habagatan sa lalawigan sa Sugbo, ang gipasanginlan nga nidagit sa 4-ka-buwan nga bata nga una kining nananghid nga ipahilot.

Sa post sa Facebook page ni Jenny dela Peña, kabanay sa ginikanan sa bata, ilang gipanawagan kon kinsa ang nakaila kang Edelyn Homecillo nga mokontak kanila tungod sa pagdala sa masuso nga iyang giatiman sukad niadtong Martes sa gabii, Mayo 17, 2022, apan wala kini mabalik hangtod ning pagsuwat kagahapon, Mayo 19, 2022.

Nanawagan sila kang Homecillo nga iuli ang bata tungod kay nabalaka na ang mga ginikanan niini.

“Pahibalo kon kinsay nakaila aning bayhana ug nakakita palihog kog PM nako or ni Arnix dela Peña kay kaning bataa gi-kidnap aning iyang yaya..,” tipik sa post ni Jenny.

Tungod niini, nidangop na sa Alegria Police Station ang inahan sa bata nga si Marivic Loduvice, taga Sitio Sangi, Barangay Madridejos, Alegria, aron matabangan nga makit-an si Homecillo ug mauli kaniya ang masuso nga luwas.

Matod ni Police Staff Sergeant Canecio Amatril, desk officer sa Alegria Police Station, nga sigun sa inahan sa bata nga wala sila magtuo nga dili ibalik sa katabang ang iyang anak kay ang pananghid niini ipahilot lang kini.

Natingala na lang sila nga naugmaan na lang apan wala mauli ang bata apil na ang katabang nga maoy hinungdan nga nagtuo sila nga gidagit niya kini ug gidala sa wala masayri nga dapit.

“Hangtod karon, padayon pa nga gipangita lagi,” matod ni Amatril.

Giadto na usab sa mga imbestigador sa Alegria police ang panimay sa katabang nga suspek sa Sitio Buyongan, Barangay Valencia nga bukirang dapit sa Alegria apan wala kini didto.

Lakip sa gisubay karon sa mga pulis ang mga kuha sa CCTV camera sa terminal sa lungsod ug pantalan nga posibling giagian niini.

Sa pagkakaron, dili pa mohukom ang kapulisan nga kidnapping ang maong hitabo samtang wala pa nila makuha ang dugang impormasiyon sa insidente.