USA ka inilang lider sa kababayen-an, negosyante, magsusuwat, ug beteranang lokal nga aktres sa entablado ug puting-tabil, Maria Victoria Betran, gidakop kagahapon, Dominggo, Abril 19, sa joint operation sa Regional Intelligence Division (RID) 7 ug Regional Anti-Cybercrime Unit (RACU) 7.

Si Beltran giakusahan nga nipakatag og “fake news” bahin sa Covid-19 cases sa dakbayan sa Sugbo nga giingong niabot na og 9,000 ka mga bag-ong kaso.

“9,000+ new cases (all from Zapatera) of Covid-19 in Cebu City in one day. We are now the epicenter in the whole solar system,” tipik sa gisuwat ni Beltran sa iyang Facebook post.

Ang post screenshot na-post sa Facebook page ni Cebu City Mayor Edgardo Labella, diin nagpasidaan kang Beltran nga naghulagway sa iyang post nga “fake news” ug usa ka criminal act.

Ang legal counsel ni Beltran, lawyer Vincent Isles, nagkanayon nga usa ka team sa mga abogado ang morepresentar kang Beltran atol sa inquest proceedings.

Si Isles nanghinaut nga ma-dismiss ang ipasaka nga kaso sa iyang kliyente.

Sa pagkakaron, ang kampo ni Beltran nagpaabot sa kalamboan sa kaso.

“Atty. Benjamin Militar will be visiting her this afternoon to reassure her that we are one with her against this petty act by our government,” matod ni Isles ngadto kang Beltran. (JJL, RRM)