Napisat ang 75-anyos nga lalaki dihang nabanggaan sa naghaguros nga pick-up sa national highway sa Barangay Poblacion, lungsod sa Tabogon, alas 4:00 sa kaadlawon sa Sabado, Mayo 21.

Ang biktima mao si Blas Fuentes, 75, mananagat, minyo, taga Barangay Cogon East, lungsod sa Carmen, kinsa dead-on-arrival (DOA) sa tambalanan.

Si Police Corporal Ian Gesite sa Tabogon Police Station nga nahinabi sa Superbalita Cebu, nagkanayon nga si Fuentes gikan namista sa dapit ug namainit sa usa ka bakery samtang nagpaabot og bus aron mopauli sa Carmen.

Apan, matod ni Gesite, ang Isuzu D-MAX pick-up nga service vehicle sa Cebu Electric Cooperative (Cebeco ) 2 nga gimaneho ni Nico Metante, 28, ulitawo, lineman sa Cebeco 2 ug taga Barangay Libertad, dakbayan sa Bogo, naghaguros sa pagdagan apan nitipas kini sa dalan, nipaingon sa poste.

Ang pick-up nabangga sa poste duol sa bakery apan naharos ang namainit nga si Fuentes hinungdan nga maayong pagkapisat sa biktima.

“Namainit siya kaon sa pandesal, nagkape kalit nga gidaro sa pick-up maayong pagkapiit sa biktima atubangan sa sakyanan,” asoy ni Gesite.

Unang gidaro sa pick-up ang motorsiklo nga gi-park dayong lahos sa poste duol sa bakery.

Si Metante ug mga kauban gikan sa lungsod sa Borbon human dunay giayo nga linya sa kuryente ug nagpadulong na sila balik sa ilang opisina sa Proper Poblacion, Tabogon dihang ang drayber nawad-an sa kontrol sa manobela.

Matod ni Metante, duka na siya kaayo ug nakatagpilaw hinungdan nga wala na niya nakontrolar ang manubela.

Ang lineman gipaubos sa liquor test human sa insidente pero nigawas nga negatibo kini sa ilimnong makahubog.

Gumikan sa impact, napasok sa atubangan sa sakyanan si Fuentes ug nakaangkon og grabing kadaot sa nagkadaiyang parte sa lawas.

Atol ning pagsuwat, si Metante gitanggong sa kapulisan sa Tabogon samtang gipaabot ang kabanay sa biktima alang sa pagpasaka og kaso batok sa drayber sa pick-up.