GIHIMAKAK ni Clarin, Misamis Occidental mayor David Navarro nga siya ang nipasiugda sa pagpangulata sulod sa usa ka massage parlor sa uptown Cebu City niadtong Miyerkules sa gabii, Oktubre 23, 2019.

Sa dihang naabtan sa mga tigbalita si Navarro, giangkon niini nga nahimo siyang bayolente niadtong tungora pero tungod kay giingong giinsulto siya ni John Dueñas, ang massage therapist nga namasangil nga gikulata siya sa mayor.

"Ilang gibastos, nahagit ko. Ako siyang nabaklid, mao to. Kung gisukmag, gikulata, kita man mo sa itsura (ni Dueñas), wala raman maunsa," sigon ni Navarro.

Wala na nihatag og dugang detalye si Navarro og iya nalang abogado ang manubag sa mga pangutana kabahin sa maong insidente.

Giakusahan si Navarro nga nanghasi og nangulata ni Dueñas sulod sa usa ka massage parlor sa dan Fuente Osmeña, dakbayan sa Sugbo, niadtong Miyerkules sa gabii.

Base sa usa ka CCTV footage sa maong insidente, nakita si Navarro nga gikulata ug gibali-bali ang bukton ni Dueñas.

Sigon ni Dueñas, nasuko si Navarro nga wala nay mga babaeng masahista nga muserbisyo kaniya kay puros silang naay kustomer niadtong orasa.

Mga pila ka oras nga nahitabo ang insidente, nasikop si Navarro sa mga sakop sa Abellana Police Station ganihang hapon sa Huwebes, Oktubre 24, sa Mactan Cebu International Airport.

Sigon sa kapulisan, padung unta mularga si Navarro sa Manila sa wala pa kini nasikop.

Pormal nga gipasakaan og kasong physical injuries ug acts of lasciviousness si Navarro atubangan sa Cebu City Prosecutor's Office.(GIKAN NI RSR SA SUNSTAR CEBU)