GIILA nga high value target (HVT) sa kapulisan sa probinsya sa Sugbo ang nasikop sa gihimong buybust sa Provincial Intelligence Branch ug laing upat pa ang nadakpan human maatli sulod sa ilang panimay sa Barangay Pooc, siyudad sa Talisay.

Alas 5:00 gahapon sa kaadlawon, Agusto 7, girumbo sa mga sakop sa PIB nga gipangulohan ni Police Lieutenant Colonel Marlu Conag ang usa ka panimay sa Sitio Tambis, Barangay Pooc, siyudad sa Talisay human masayod nga dunay nagpadayon nga transaction sa ilegal nga drugas.

Pag-abot sa dapit usa ka pulis nga nagpatuo nga kustomer ang mipalit og usa ka pakete sa gituohang shabu balor duha ka gatus ka pesos.

Apan sa dihang nag positibo ang pagpalit sa police gi lusad dayon ang pagsikop sa mga sakop sa PIB kang Martin Pardillo Canales nga target sa operation ug gilakip na ang laing upat nga naa sa sulod. Ang laing upat nga nasikop mao ang magsuong Rodel ug Rosval Alcantara, Jason Romero Cañizares ug Welbert Barliso Abasial nga pulos nakuhaan og mga pinutos sa illegal nga drugas nga motimbang sa 34.21 grams nga mokantidad ang tanan sa kapin P232,628.00.

Usa sa mga operatiba sa PIB mitug-an sa Superbalita Cebu nga mga usa ka buwan nga ilang gipaubos sa surveillance si Canales human makadawat og impormasyon gikan sa mga silingan nga mibalik kini sa illegal nga negosyo. Human masuta nga mibalik kini pinaagi sa pag test buy sa usa ka pulis gilusad dayon ang buy bust operation.

Si Canales miangkon nga nadakpan na siya kaniadto ug naka gawas pagka 2017 human maka pyansa sa iyang kaso nga giatubang apan mibalik siya tungod sa kalisud.

“Lisod kaayo sir uy kay walay pamugas mao nga mibalik kog ginagmay, unsaon ta man nga nadakpan naman sad ko,” matod ni Martin Canales.

Usa sa mga dinakpan nga si Jason Cañizares miangkon nga usa siya ka call center agent apan aduna siyay usa ka anak nga gibuhi nga naa sa iyang ginikanan. Naatlan lang matod pa siya nga mipalit kang Canales human sugoa sa usa ka customer diin aduna siyay 200 pesos nga patong sa matag pakete yawat nalang matod pa niya nga maka tabang sa gasto alang sa iyang anak. (AYB)