Naluwas sa awtoridad ang usa ka Chinese national nga gikidnap ug nasikop ang duha ka mga kidnapper nga Chinese national usab sa pagronda sa usa ka safehouse sa kidnap for ransom group sa Barangay Mactan, dakbayan sa Lapu-Lapu niadtong Mayo 7, 2022.

Ang PNP Anti Kidnapping Group uban sa Lapu-Lapu City Police Office (LCPO), ug Regional Intelligence Division sa Police Regional Office (PRO) 7 malampusong niluwas ni Li Hong Yu, Chinese national, sa usa ka balay sa Vistamar Village sa Barangay Mactan.

Nadakpan ang duha ka Chinese nationals nga sila si Xue Rong Tongug Li ug Guo Min.

Ang biktima nga si Yu, 34, ulitawo, negusyante, nahanaw niadtong Mayo 4, 2022, alas 4:14 sa hapon samtang didto sa usa ka kan-anan sa Sitio Soong 2 sa Barangay Mactan.

Si Police Lt. Col. Lee Allen Bauding, OIC sa AKG-Visayas Field Unit uban nila ni Police Col. Arnel Banzon, director sa LLCPO maoy nangulo sa operasyon.

Si Police Lt. Zozimo Ravanez, Jr, team leader sa AKG 7 Visayas Field Unit, niingon nga nangayo og ransom ang mga suspek sa pamilya sa biktima sa kantidad nga USD 200,000.00 (P10 milyunes).

Apan ang kabanay nangayo og abag sa Police Station 2 sa LLCPO, kinsa nakig-alayon dayon sa AKG 7 Visayas Field Units.

Nasubay nila ang nahimutangan sa mga suspek, kinsa nakabasi sa Manila, naabot dinhi sa Sugbo.