Nagpamasahe namatay human giatake sa sakit sa kasingkasing alas 8 sa gabii, Biyernes, Hunyo 2, sa Brgy. Poblacion, lungsod sa Santa Fe, Isla sa Bantayan.

Si Benjamin Roxas, 58, ulitawo, auditor sa usa ka motorcycle company, taga Hipodromo, dakbayan sa Sugbo, namatay sa tambalanan sa lungsod sa Bantayan.

Si Police Staff Sgt. Ritchie Gapo, imbestigador sa Santa Fe Police Station nga nahinabi sa Superbalita Cebu, nagkanayon nga ang biktima nibisita sa dapit aron magpamasahe sa usa ka spa.

Human sa pagmasahe sa likod, ang nagmasahe nipahayang kaniya aron hiluton ang paa apan nitubag nga nakatulog siya.

Naluya, naglisod sa pagginhawa hinungdan nga mikuha sa maintenance nga tambal nga naa sa bag.

Apan human nakainom, nisamot nga naglisod siya sa pagginhawa hinungdan nga ang mga staff nanawag og ambulansiya.

Samtang nagpadulong sa hospital, gisuwayan siya sa pagtabang, naglisod gihapon sa pagginhawa ug namatay.

Sumala ni Gapo nga nasuta nila nga dunay gihambin nga sakit sa kasingkasing.

Regular kini nga local tourist diin sa matag-abot niya, magpamasahe. (GPL)