Usa ka 71 anyos nga ginang namatay sa sunog sa Lunes sa alas 5:40 sa hapon, Septiyembre 28, 2020 sa Sitio Lower Saksak, Barangay Abucayan, Balamban, Sugbo.

Ang biktima giila nga si Estelita Laya Deiparine, biyuda, paralisado.

Si Police Senior Master Sgt. Excelsior Aguanta sa Balamban Police Station nga nahinabi sa Superbalita Cebu nagkanayon nga katol nga pang-abog sa lamok ang hinungdan sa sunog.

Ang anak ni Deiparine ang nidagkot sa katol nga dunay stand ug gibutang sa may katre sa iyang inahan.

Wa na maluwas pa ang ginang tungod sa kadako na sa kayo nga daling mitilap sa kurtina ug uban pang bahin sa lawak ni Deiparene, dugang ni Aguanta.

Samtang si FO3 Karl Adrian Sanornido niingon nga ang anak ni Deiparene nga si Chona nisulti nga matag alas 3 sa hapon niya butangan og katol ang lawak sa iyang inahan.

Gibana-banang P100,000 ang danyos sa sunog. (GPL)