Kritikal ang kahimtang sa usa ka lumolupyo sa sityo Cabancalan 2, Brgy. Bulacao, dakbayan sa Sugbo human naigo ang iyang ulo dihang gipusil pasado alas 9 sa gabii sa Lunes, Disyembre 5, 2022.

Ang biktima giilang si Armando National, 54. Ang imbestigador nga si Police Staff Sergeant Elijah Jihad Catacutan sa Inayawan Police Station nibutyag nga ang gunman amigo ra usab sa biktima nga giila niini nga si Gilbert Milan Jr., hingkod, kanhi silingan.

Ang pagpamusil nahitabo sa sityo Bulsita sa mao nga barangay. Human sa insidente, ang biktima dali usab dayon gidala sa iyang anak nga si Steve sa usa ka pampublikong tambalanan gamit ang motorsiklo sa iyang amahan.

Nasayran nila nga sa wa pa ang pagpamusil, si National nadunggan nga nangasaba kang Milan. (BBT)