LAING insedente sa pagpamusil-patay ang nahitabo sa dakbayan sa Mandaue kagahapon sa kadlawon.

Ang biktima giila sa kapulisan sa Mandaue City nga high value target ug nasuta usab nga nalambigit kini sa prostitusyon, kun maoy tigbugaw sa kababayen-an, kasagaran mga menor de edad.

Patay diha-diha dayon human nakaangkon og mga samad sa ulo ug lawas ang biktima nga giilang si Wendel Tampos, 38, taga brgy. Paknaan, dakbayan sa Mandaue.

Nadawat sa kapulisan ang alarma sa pagpamusil ala 1 kagahapon sa kaadlawon sa dan A.C Cortes, Brgy. Guizo sa mao nga siyudad.

Base sa inisyal nga pakisusi sa Centro Police Station nga naglakaw si Tampos padung sa usa ka lodge.

Sa paghiabot niya sa atubangan sa usa ka 24-hour convenience store, kalit nga duha ka mga lalakeng sakay sa usa ka motorsiklo ug nakataptap ang mga nawong, niabot.

Ang backrider kalit lang namusil sa biktima.

Gitug-an ni Police Senior Supt. Julian Entoma, Mandaue City Police Office director, nga si Tampos usa ka drug surrenderer ug napriso na niadtong 2015 tungod sa kasong pagpamaligya sa ginadiling’ drugas.

Giangkon ni Entoma nga HVT sa ilang drug watch list si Tampos ug subject unta sa ilang mga buy bust operation, apan gihulagway nga idlas. FMDD