GIHANGOP ni Ormoc City Mayor Richard Gomez ang desisyon sa Malacanang nga iuswag ang pagbukas sa klase karong buwana.

Sa Biyernes, Agusto 14, si Department of Education (DepEd) Secretary Leonor Briones mi-anunsyo nga imbes sa Agusto 24 ang pagbukas, giuswag na kini ngadto sa Oktubre 5, 2020.

Matod sa DepEd, gilugwayan ang pagbukas aron hingpit nga makaandam ang mga tunghaan, mga magtutudlo ug mga tinun-an sa subli nga pagpahigayon sa klase pinaagi sa ‘distance learning’ gumikan sa coronavirus disease 2019 (Covid-19).

Sa iyang bahin, si Ormoc City Mayor Richard Gomez mihangop sa maong desisyon ug dako kini nga tabang aron mas makaandam ang mga teaching staff ug estudyante. “I think this is good so the DepEd can fully prepare for the modalities they will undertake,” matod sa mayor

Way problema alang sa mayor kon karong tuiga sugdan ang klase kaysa magpaabot kon kanus-a duna nay aprobadong bakuna. “Bakuna will take long pa, maybe by next year pa yan. October should be enough time to realign sa ilang mga program,” dugang sa mayor Ang lokal nga kagamhanan sa Ormoc nigahin og P48.1 milyone para sa paghatag og mga ekipo ug pagtukod og edipisyo para sa DepEd.

Base sa presentasyon sa DepEd Ormoc City Division, ang LGU Ormoc mihatag og 45 units portable media library - knowledge channel foundation; 10 units sa digital duplicator alang sa paghimog mga kopya sa learning modules; paggahin og computer hub alang sa ALS learners sa ka 10 districts ubos sa GOMA Cares; LR and Library Facilities and Equipment; pagtukod ug pag-ayo sa school buildings ug SEF continuing legislative appropriation. / JKDP