NABALAKA karon ang grupo sa Transport Network Vehicle Services (TNVS) sa Sugbo tungod sa posibilidad nga katunga kanila ang mawagtangan og panginabuhi subay niining 1,500 ra ang gigahin sa Land Transportation Franchising and Regulatory Board (LTFRB) nga pabiyaheon nga TNVS sa Sugbo.

Ang nagkadaiyang grupo sa TNVS sa nasod diin naglakip kini sa Metro Manila, Pampanga, Cebu ug Bacolod Chapters, mipadala og suwat ngadto kang Presidente Rodrigo Duterte ug Department of Transportation (DOTr) Secretary Arthur Tugade aron mangayo og tabang.

Matod ni Bimbo Grapa, ang signatory sa TNVS Cebu nga katunga sa 3,000 ka mga TNVS driver sa Sugbo ang posibleng mawagtangan og panginabuhi kon ipa-deactivate kini sa LTFRB.

Usa sa gikabalak-an usab sa mga drayber kining pagpuno og dugang rekisito sa pagkuha og Provisional Authority (PA) ug Certificate of Public Convenience (CPC) gikan sa LTFRB, kining Bank Conformity.

Si Rodolfo Hermosa, usa sa drayber nagkanayon nga hangyo nila sa LTFRB nga dalion ang proseso sa pagkuha og PA ug CPC.

Dunay 15 ka grupo sa TNVS ang Sugbo sa pagkakaron diin aduna kini’y kapin sa 3,000 ka mga miyembro ug nibutyag nga dili mag-transport holiday sa Lunes, Hulyo 8, sama sa TNVS sa Metro Manila.

Ang chairman sa LTFRB nga si Atty. Martin Delgra nagkanayon nga wala sila’ nadawat nga reklamo sa TNVS sa Sugbo ug walay basehan kining pag transport holiday sa mga TNVS. (HBL)