JERRY Guardo nihimo na sa iyang oath-taking sa pagka-konsehal sa Dakbayan sa Sugbo nga gi-administer ni Cebu City Mayor Edgardo Labella alas 9 sa buntag, Martes, Hulyo 2, 2019.

Gihimo kini sulod sa temporaryo nga buhatan ni Labella, ang buhatan sa dihang siya pa ang bise mayor.

Gihulagway ni Guardo nga grasya ug kabubut-on sa kahitas-an nga mopadayon siya sa pagserbisyo sa mga Sugbuanon.

Giangkon ni Labella nga bisan kon wala pa opisyal nga nitapon sa ilang partido si Guardo, kampante siya nga suportado niini ang iyang mga programa ug proyekto alang sa dakbayan.

Dugang sa mayor nga aron dili maglisod sa pagpatuman sa mga tinguha nga proyekto, anaa ang 'number games' sa konseho.

Sa pagkakaron, matud ni Guardo nga ubis gihapon siya sa partido nga PDP Laban. Giangkon niya nga iyang gihuna-huna ang pagtapon ngadto sa partido ni Labella.

Giproklamar si Guardo Lunes sa buntag, Hulyo 1 sa Commission on Elections isip ika-walo nga konsehal sa Cebu City north district human gi-disqualify si Alvin Arcilla. (Superbalita Cebu)