NASAGMUYO si Talisay City Mayor Gerald Anthony Gullas sa Department of Public Works and Highways (DPWH) ug kontraktor nga nagtrabaho sa Mananga bridge.

Nipadayag usab siya sa iyang official Facebook page nga siya naulawan sa dihang bisan personal na niya nga gipakigtagbuan ug gipangutana sa rason kon nganong di matuman sa kontraktor ang ulahi nga saad, wa kini gikahatag nga rason.

Una na nga gipasalig sa DPWH 1st Engineering District ug contractor nga karong Domingo, Agusto 4, magamit sa kinatibuk-an ang taytayan.

“Based on our site inspection, all I saw was that they still need to finish the bridge’s railings, to asphalt the road. Have it cured for a few days and to check for stability and safety. Despite the construction schedule they prepared and showed me during our meeting last month and their promise to open the bridge by August 4, it disappoints me to find out that those promises were not etched in stone,” padayag sa mayor.

Si Gullas nangayog pasaylo sa publiko, ilabi na sa Talisaynon, sa samot nga pagkalangay ug pabiling masinati nga paghuot sa trapiko sa highway.

Ang pag-ayo sa taytayan niadto pa untang Marso ning tuiga mahuman.

“I realized, to my disappointment, that the Department of Public Works and Highways (DPWH) is not answerable to local chief executives, especially on delayed infrastructure projects,” dugang sa mayor.

Hinuon, matod ni Gullas nga laing pasalig sa DPWH ug contractor nga sa Agusto 10 ug 11 ning tuiga, atol sa pagpahigayon sa Ironman event, ablihan sa kinatibuk-an ang taytayan.

Kini aron paghatag og higayon sa mga sakyanan nga padulong sa habagatan ug amihanang bahin sa Sugbo sa pag-agi.

Kay ang South Coastal Road sirado alang sa bike event.

Apan sa paghuman dayon sa kalihukan diha sa SCR, sirad-an usab dayon nila ang pikas bahin sa taytayan aron sa paghuman sa trabahuon.

Dugang sa mayor, walay gihatag na nga petsa kon kanus-a hingpit magamit ang tibuok taytayan.

Panawagan niya sa DPWH nga unta tutukan kini nga proyekto nga nakahatag na og dugang kahasol sa publiko.