GIUSWAG na usab sa Hulyo 10 ang pre-trial sa kasong murder nga giatubang ni Renato Llenes, akusado sa pagpatay kang Christine Lee Silawan.

Ang prosekusyon nihangyo kang Regional Trial Court (RTC) Branch 70 Judge Christine Muga-Abad sa dakbayan sa Lapu-Lapu sa pagsibog gumikan kay wa pa sila mahuman og markings sa ilang exhibit sa mga ebidensya.

Matod ni Fisccal Ruso Zaragosa nga tungod sa kadaghan sa ilang mga ebidensya, nadugay sila og markings.

Buot sa prosekusyon nga han-ay ang tanan nilang mga ebidensya aron masigurong lig-on ang ilang kaso batok ni Llenes, hilabina kay kini high profile ug capital offense.

Kuwang usab sila og fiscal mao nga kada usa nila naghupot og tagduha ka kaso.

Ang abogado ni Llenes nga si Atty. Manuel Degollacion Jr. nibutyag nga plano sa iyang kliyente sa paghangyo sa korte sa pag-consolidate kun pag-usa na lang sa kasong murder ug illegal possession of firearms ug Commission on Elections (comelec) gun ban, apan magpadayon kini sa linahing hearing sa RTC Branch 60 sa Hulyo 5. (GCM)