HEPE sa Land Transportation Office (LTO) Tagbilaran, lalawigan sa Bohol, parelibuhan ni LTO 7 Regional Director Victor Caindec.

Gikatakda nga kagahapong adlawa tuyo nga mibiyahe si Caindec paingon sa Bohol bitbit ang relief order alang ni Engr. Samuel Alabat, hepe sa LTO Tagbilaran.

Matod ni Caindec, ubay-ubay nga reklamo ang nadawat sa iyang buhatan kalabot sa giingong way sistema ang pagpadagan ug daghang fixers diha sa sud ug gawas sa maong buhatan.

Gani, personal nga nasaksihan ni Caindec ang problema sa iyang pagduaw sa mga miaging semana.

“I spoke to the person in-charge and told him you have to fix it. Otherwise we will come back with an order to relieve you,” dason sa opisyal.

Matod ni Caindec, lakip ang security guard sa maong LTO office namaligya og insurance ug adunay mga non-LTO personnel nga naa sa sud sa buhatan.

Sa dihang gipatawag ang hepe aron nga mangayo og katin-awan, naatol nga wa diha kay matod pa nag-lunch break bisan nga dili pa oras sa tingpaniudto.

“Wa ma ko mosulti nga siya (Alabat) directly involved, ang atong gisulti nga ang public has been complaining ever since,” pasabot sa opisyal.

Ang LTO7 mobutang og tawo sa maong buhatan nga maoy mo-ila niadtong uban pang empleyado nga adunay ipabilin o ibalhin ug kadtong job order employee nga mapamatud-an nga involved sa binuang ang automatic nga itaktak sa trabaho.

Samtang si Alabat kasamtangan nga ibutang sa puwesto nga dili maka-apekto sa serbisyo sa frontline ug hayan ibalhin sa laing dapit sa rehiyon, paapas ni Caindec. (FVQ)