Ang Mandaue City Police Office (MCPO), uban sa Mandaue Investment Promotions and Tourism Action Center (MIPTAC), nihimo og usa ka adlaw nga heritage tour sa pagsaulog sa 124th Philippine Independence Day kagahapon, Hunyo 12.

Kini aron paghatag og kasayoran sa katawhan, labina sa mga batan-on, bahin sa Philippine Independence ug mabayanihong buhat sa katiguwangan.

Ang MCPO nilusad sa heritage tour niadtong Biyernes, Hunyo 10, 2022.

Si Police Major Hugo Reo Ipong, acting chief sa MCPO’s City Community Affairs Development Unit, niasoy sa mga sakop sa media nga usa usab kini sa pagpalambo sa turismo sa dakbayan.

Ang tour nilangkob sa inilang heritage sites, sama sa Bantayan sa Hari sa Barangay Looc, National Shrine ug Parish of Saint Joseph ug ang Mandaue City Plaza sa Barangay Centro.

Ang heritage tour nagsugod sa alas 8:00 sa buntag ngadto sa alas 10:00 sa buntag nga giapilan sa dili mominos 100 ka indibiduwal gikan sa kapulisan, youth organizations, faith-based groups, ug city tourism personnel.

Kini ang ikaduhang heritage tour nga giorganisar sa MCPO, ang una atol sa Day of Valor niadtong Abril 9, 2022.

Si Maria Loreen Lugo-Arguedo, MIPTAC tourism operation officer, mapasalamaton sa MCPO tungod sa pagtabang sa pagpalambo sa turismo sa Mandaue City.