UPAT ka mga high-profile drug personalities nga anaa na-priso sa Mandaue City Jaila ang kapila ka higayon na nga nihangyo sa warden nga dili una motambong sa pagdungog sa ilang mga kaso.

Kini ang gitug-an ni Jail Superintendent Jessie Calumpang, human nga giingong nagpanguyawan na ang mga drug personalities sama sa lider sa Sadaya drug group, ug uban pa, nga ma-ambush ang sakyanan nga ilang sakyan padung sa korte.

Sama nalang sa pipila na ka mga nahitabo nga pagpamanhig sa sakyanan sa Bureau of Jail Management and Penology, sa Cebu Provincial Detention and Rehabilitation Center ug niadtong uwahi, sakyanan sa pulis sa probinsya sa Sugbo, diin patay gyud ang piniriso nga padung unta sa iyang hearing. Swerte nalang nga nabuhi ra ang pulis nga kuyog niini.

Dugang ni Calumpang nga halos na lang mohilak nga mohangyo kaniya ang maong mga piniriso nga di lang sila ipugos sa pagtambong sa hearing sa ilang kaso, ug diha lang sila sa bilanguan.

Wa na usab nakuha pa nga mga ilegal nga drugas sud sa Mandaue City jail, atol sa gipahigayon nga greyhound operation Myerkules (Enero 23), uban ang pdea ug kapulisan sa Mandaue.

Nakuha nalang ang mga nuisance contrabands, sama sa mga speaker, electric wires, ug mga lighter.