Ang Department of Social Welfare and Development (DSWD) mohatag og pinansyal nga tabang ngadto sa kapin sa 4,000 ka retrenched nga mga trabahante gikan sa nagkalainlaing kompaniya sa dakbayan sa Lapu-Lapu karong adlawa, Oktubre 4, 2022.

Sa usa ka pamahayag, si DSWD 7 Director Shalaine Lucero niingon sa Lunes, Oktubre 3, nga ang schedule sa payout kay alas 11 sa buntag, nga pangulohan nila ug ni DSWD Undersecretary for Inclusive and Sustainable Peace Alan Tanjusay.

Ang rehiyonal nga buhatan niingon nga sila ang mangulo nga ahensya sa multi-stakeholders nga motabang ug interbensyon alang sa nangataktak nga mga trabahante.

Samtang wala pa niya ibutyag ang eksaktong kantidad nga madawat sa retrenched nga mga trabahante, ang regional director miingon nga ang tabang himuon pinaagi sa Assistance to Individuals in Crisis Situations (AICS).