GIBISITA ni Talisay City Mayor Gerald Anthony Gullas Jr. sa Martes sa buntag, Agusto 4, 2020 ang usa ka lola nga centenarian.

Nagsaulog sa iyang ika 100 nga edad niadtong Mayo si Rizalina Mil o mas nailhan nga Lola Lin sa Martes, Agusto 4, 2020.

Gitunol ni Gullas ang P50,000 nga financial assistance sa Siyudad ug plaque.

Ang Siyudad dunay ordinansa nga naghatag og P50,000 isip pinansyal nga hinabang ug plaque ngadto na sa mga centenarian nga lumolupyo sa Dakbayan sa Talisay.

“For the information of everyone, when our administration started, I always wanted to find time to visit centenarians because its truly a blessing from God to reach that age,” Butyag ni Gullas

Gidugang ni Gullas nga kwalipikado usab si Lola Lin nga makadawat og pinansyal nga hinabang sa Department of Social Welfare and Development (DSWD) nga P100,000 ug P100,000 gikan sa probinsya sa Sugbo.

Matod pa ni Gullas nga lahi ang sekreto ni Lola Lin sa uban nga mga centenarian nga iyang nabisita kay kon sila utan ang kinaon, ang iyaha kay humba.

Matod pa sa mga anak niya nga kay lagi magluto siya og utan kaniadto, iya kining ipakaon sa iyang bana samtang ang iyaha humba.

“I asked her family, `Unsa man kinaon aning Lola Lin na naabot man og 100 years old?’. The usual answer of centenarians when I ask them how they get to live such long lives is usually the same ‘kamungay gyud tawn, Dong. But Lola Lin was different, actually na shock ko sa tubag sa iyang apo when I asked what’s the secret nya naabot og 100 years old, humba daw,” nagkanayon si Gullas. (BBT)