USA ka debate tali sa mga kandidato sa pagka-mayor ug bise mayor sa syudad sa Sugbo ang gi-organisa sa Integrated Bar of the Philippines (IBP) Cebu City Chapter.

Niadtong Lunes, si Atty. Regal Oliva, pangulo sa IBP Cebu City Chapter, ang mi-post sa iyang FB page nga nanagawan sa mga kandidato sa pagka-mayor ug bise mayor sa dakbayan sa Sugbo alang sa usa ka debate diin sila sa IBP ang magsilbing moderator.

Ang maong post nakahagdaw og 227 ka shares, 170 ka mga comments ug 958 ang mga mi-react.

Mismong ang FB account ni Mayor Tomas Osmeña ang dali nga naka-share sa post ni Oliva, uban ang caption niini nga game siya.

Ang magpapili sa pagka bise mayor, kaalyado ni Osmeña nga si konsehal Mary Ann Delos Santos, pinaagi usab sa iyang FB account ang mipadayag sa iyang pag-uyon.

Si Bise mayor Edgardo Labella, kaatbang ni Osmeña pagka-mayor, ang nidawat usab sa imbistasyon, sigon sa iyang tubag sa social media.

Hangtod ning pagsuwat wala pay tubag gikan ni kanhi Mayor Mike Rama kinsa magpapili pagka vice-mayor pares ni Labella.

Giklaro usab ni Oliva nga bisan kadtong mga independent nga magpapili pagka-mayor ug bise mayor sa dakbyan ang ilang giawhag nga mosalmot.

Nasayran nga adunay tag lima mikandidato pagka-mayor ug pagka-bise mayor sa siyudad sa Sugbo.

Gikatakdang mopadala og suwat ang IBP karong adlawa, Abril 3, og pormal nga suwa ngadto sa mga kandidato.

Ila na usab nga gihan-ay ang mga guidelines alang sa debate nga molanat sa tulo ka oras.

Inisyal nga adlaw nga kini ipahigayon karong Abril 22, adlawng Lunes, sa alas 9 hangtud sa alas 12 sa udto, diha sa City Sports Club, diin bukas kini sa mga supporters nga buot mosaksi.

“Part of the IBP-Cebu City chapter is that we enable our members of the social responsibility, and part of it is that we need also to communicate with the constituency of Cebu City, as to the people who will they be voting (during May 13 election) and we believe that the mayoralty and vice mayoralty candidates have a very great role to play in the future in shaping up the City Of Cebu, and being the president of IBP (Cebu City chapter), we try to formulate the gathering of these candidates so that we can hear from them their advocacies, their opinions and their stands on various issues and matters involving or surrounding the City of Cebu,” pagpasabot ni Oliva sa Superbalita Cebu.

Giklaro usab ni Oliva nga siguruon nila nga dili gyud mamahimo nga bias alang lang sa usa ka kandidato o kampo ang maong debate ug ingon man ang seguridad.