USA ka ginang gisikop sa mga sakop sa Criminal Investigation and Detection Group (CIDG) 7 atol sa entrapment operation sulod sa usa ka mall nga nahimutang sa N. Bacalso ave. Barangay Pahina Central, Siyudad sa Sugbo, niadtong Oktobre 31, 2019.

Ang gidakop mao si Cherry Flores, 50, taga Salvador street, Barangay Labangon, Siyudad sa Sugbo. Gireklamo siya ni Juliet Aba human gipasaligan nga makatrabaho sa Poland bugti sa P55,000 nga processing fee.

Matod ni Flores nga di tinuod nga illegal recruiter siya tungod kay aduna silay lisensya sa buhatan sa Metro Manila.

Giangkon niya nga wa pa silay opisina dinhi sa Cebu ug wa siyay napakitang permit sa Philippine Overseas Employment Administration (POEA). (AYB)