Abagan sa Kagamhanan sa Probinsya sa Sugbo ang pag-operate sa nabantog nga Kawasan Falls, lungsod sa Badian sa tinguha nga mas mapalambo ug mapailaila pa kini sa kadaghanan.

Gianunsiyo ni Cebu Governor Gwendolyn Garcia nga sugdan na niini pagpa-demolish ang giabandonar nga mga istruktura ug uban pang mga materyales nga maghatag og risgo sa mga turista ug mangaligo.

Ang maong mga istruktura salin pa sa kadaot sa bagyong Odette niadtong 2021.

Si Garcia nagkanayon nga ang pag-abag sa Kapitolyo dili lang kutob sa pagpa-demolish apan lakip na ang pag regulate sa tanang canyoneering operations sa Kawasan Falls nga nahimutang sa Barangay Matutinao, taho sa Sugbo News, web based media platform sa Office of the Governor.

“We have to clear that. So that we will really be able to see the full splendor of Kawasan Falls without these eye sores, so we would be clearing that,” matod ni Garcia.

Subay niini, gilauman ang mga kausaban ilabi na sa mga palisiya nga ipatuman lakip na ang pagpatuman sa standard rates.

“[The provincial government also seeks to] allow tourism stakeholders in Badian to properly organize, and adopt a unified treatment of the canyoneering guests,” asoy ni Garcia.

Samtang ang Tourism Officer sa lungsod sa Badian, Earl Endab, nagkanayon nga gibanabana nga moabot sa P1,300 ang operator’s fee.

Matag adlaw, gibanabana usab nga moabot ngadto sa 700 ka mga turista ang modagsa sa Kawasan falls.

Kahinumdoman nga niluwat og kamandoan si Garcia nga Executive Order No. 14 aron temporaryong ipahunong ang canyoneering activity ug uban pang tourist activities sa naasoy nga lugar samtang nagpadayon pa ang demolition.

Giklaro ni Garcia nga sa wala pa siya moluwat og lagda, iya nang gipahibawo daan ang mga opisyal sa lokal nga kagamhanan sa lungsod ingon man ang mga opisyal sa barangay.

“I don’t want a black mark on Cebu’s tourism particularly on Kawasan Falls... So, rather than allow that disaster to happen, we might as well take preemptive action that’s why I had to issue that EO,” matod ni Garcia.