NIMANDU si Mandaue City Administrator Atty. Danilo Almendras og dinaliang inbestigasyon batok sa Davao City Environmental Care Inc. (DCECI) Biyernes, Enero 11.

Kini human niabot sa iyang buhatan ang taho sa reklamo sa mga molupyo diha sa Barangay Umapad, Dakbayan sa Mandaue nga nagpuyo dili layo sa nahimutangan sa pasilidad sa DCECI nga diha sa atbang sa ilang pasilidad nga duol na sa agianan sa Butuanon River ang mga dagkong yellow plastic nga adunay sud sa nga hospital waste.

Gani giingong sa matag hapak sa hangin, ilabi na karon nga amihan, mangalisbo sa ilang kabalayan ang grabe nga kabahu gikan sa maong hospital waste.

Unang gimanduan ni Almendras ang City Environment and Natural Resources Office (Cenro) sa pagsusi sa maong reklamo.

Laing gimanduan sa pagsusi mao ang Department og General Services ug City Legal Department.

Dali usab nga gitawgan sa city administrator ang licensing office alang na sa pagpa-alarm kon ugaling mo-proseso karon nga tig-renewal sa permit ang DCECI.

Kini aron kapugngan una nga mabag-uhan sa ilang permit, samtang gihimo pa ang pakisusi.

Kahinumduman nga ang DCECI ang gipaubos usab sa inbestigasyon sa Enbironment Management Bureau-Central Visayas isip maoy tigkulekta ug tig-dispose sa basura sa mga tambalanan sa Chong Hua Mandaue City ug UCMed.

Kini human usab nga daghan sa mga plinastik nga hospital waste ang nidagsa sa kabaybayunan sa Syudad sa Lapu-Lapu, sukad niadtong Sabado.