INAHAN nga nanglaba wala makatiwas sa pagpangwaswas sa sinina kay gipusil sa iyang silingan alas 6:20 sa buntag sa Lunes, Marso 14, sa Purok Hilltop, Barangay Canamucan, lungsod sa Compostela, amihanang Sugbo.

Si Nina Lumbad Cadungog, 39, nagpuyo sa nahisgutang lugar, namatay diha-diha human nakaangkog daghang mga samad pinusilan sa ulo ug kalawasan.

Ang suspek nga wa pa madakpi sa pagsuwat ning taho giilang si Anthony Roca Ternate, usa ka security guard, apan nasikop ang iyang asawa nga si Madelyn Ternate.

Usa ka 17 anyos nga dalaga ang nakuhang saksi sa kapulisan, apan gipugngan ang ngan alang sa seguridad.

Si Police Lt. Samuel Negro, hepe sa Compostela Police Station nga nahinabi sa Superbalita Cebu, nagkanayon nga bangi sa road right of way ang motibo sa krimen.

Matod ni Negro nga nasuko ang managtiayong Ternate kang Cadungog kay naglisod sila og agi kay nasangit ilang motorsiklo sa mga tanom sa ginang.

Gumikan niini, nagkalalis sila si Cadungog ug magtiayong Ternate.

Tungod sa kainit sa ilang sininghagay, nilakaw si Anthony ug pipila ka minutos nibalik, gipusil makatulo ka higayon si Cadungog tumong sa ulo ug lawas samtang nangwaswas sa gripo duol sa balay sa ginang.

Daling nisibat si Anthony samtang si Madelyn nasikop.

Sumala ni Negro nga ang asawa kasuhan nilag conspiracy kay bisan nakakita siya sa iyang bana nga nipusil kang Cadungog, wala kini nihimo og lakang sama sa pagpugong niini.

“Masangit man ilang motorsiklo sa tanom sa biktima. Nganong ang road right of way alihan. So pag-agi sa mga suspek, nireklamo, naabot sa away, niresulta sa pagpamusil,” dugang ni Negro.

Kasong murder giandam sa kapulisan batok kang Anthony.